副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

★未夠三個月唔講得? 新手媽媽懷孕過三關攻略★

俗語有云: 「怕寶寶小氣,未夠三個月唔講得。」我認為最主要的原因係想先確定寶寶的情況,等待時機成熟才對外分享。初初知道自己懷孕,又驚又喜,唔知下一步要做咩,但又唔敢問身邊的人 ......下一步應該要

俗語有云: 「怕寶寶小氣,未夠三個月唔講得。」我認為最主要的原因係想先確定寶寶的情況,等待時機成熟才對外分享。初初知道自己懷孕,又驚又喜,唔知下一步要做咩,但又唔敢問身邊的人 ......下一步應該要點做?   ★第4-6週★: 自行驗孕 – 當發現自己的經期來遲了,懷疑自己懷孕,就應馬上用驗孕棒自行驗孕 (驗小便)。當時我買了2支,一支電子版,一支萬寧自家品牌,2支的價錢相差超過一倍,最後發現後者足夠有餘!唔使浪費金錢買貴價驗孕棒,有就有,無就無,結果都係一樣的:)   診所驗孕 – 當時我查詢屋企附近的家庭醫生,姑娘話驗孕的收費係$150或$300起。相差咁遠,究竟有咩分別? 前者係姑娘用驗孕棒幫你驗孕 (同你係屋企做的一模一樣),確定懷孕之後就叫醫生提供懷孕証明 (certificate of pregnancy),全程無得見醫生;後者就係多左見醫生呢個步驟,由醫生讀出驗孕結果,但無得照超聲波…… 有些媽媽會花$500-$1000去見婦科醫生,但理智的我當然揀$150拎張懷孕証明埋單走人啦!   懷孕證明 – 診所會根據你提供的最後一次經期和週期日數等資料推算預產期,呢張文件非常重要,一定要好好保管!日後去公立醫院登記婦產科、向公司申請產假、加入媽媽會、去BB展領取禮品等等。   預約私家婦產科醫生 – 預約大概第6-8週的時間,由私家婦產科醫生做第一次產檢,用超聲波確認胚胎情況,檢查BB心跳。   登記公立醫院婦產科 – 唔使走來走去,用「預約通」手機程式登記政府醫院婦產科便可,大概3-5個工作日左右收到醫院電話回覆,通知第一次去公立醫院見醫生的日期。   ★★★ 媽媽,恭喜妳!確定懷孕後可以準備過三關了……★★★   ✔第一關 (第6-8週):照閃閃 - 私家婦產科醫生做第一次產檢,除左基本檢查 (度高、磅重、量血壓) 和了解孕婦病歷之外,最重要係用超聲波確認胚胎情況,檢查BB心跳是否正常,胚胎著床位置是否理想,有沒有宫外孕等情況。   - 唔建議太早去做,胚胎未發展成熟,照超聲波也未必可以清楚見到,免得自己嚇自己。   - 孫師奶大概係第7週去照閃閃,期待左2-3個星期,當時等左2個半鐘,見醫生5分鐘,返到屋企喊到眼腫!照閃閃一切順利,但醫生話胎盤位置偏低,代表流產機會比較大…… 對於一個新手媽媽來講真係好大打擊,後來好多媽媽話呢個係懷孕初期的普遍現象,胎盤慢慢會升高的,結果再下一次産檢 (第11週) 時果然升高了。當中4個星期係非常忐忑不安的,一切都怪自己遇到一個太老實,唔夠愛心的醫生。   ✔第二關 (第10-12週):度頸皮 - T21 / Nifty的檢查 (自選項目) - 抽血檢查BB有無基因突變,甚至預先知道BB性別。雖然有啲貴,但做左安心好多,我認為好值得!孫師奶當時做T21,大概$5000左右。   - 公立醫院第一次產檢 + 唐氏綜合證篩查 (所謂的「度頸皮」),大概2個星期出結果,到時報告有問題的話會電話通知…… 令人忐忑不安的2星期。   - 預約私家婦產科醫生第20-24週安排結構檢查,大部份婦產科醫生的檔期都排得密密麻麻,建議提早預約。   ✔第三關 (第20-24週):結構檢查 - 結構檢查非常重要,無論係私家還是公立都一定要做! 詳細檢查胎兒每一個器官,連手指和腳指都數得清清楚楚。全程大概20-30分鐘左右,係懷孕期間最長的一次產檢,可以見BB最耐。   - 一般而言,公立醫院只為高齡或風險比較高的孕婦安排結構檢查,如公立醫院未能提供結構檢查,請自費去搵私家婦產科醫生做,呢筆錢唔好慳! 孫師奶當時上網做過功課,收費大概$2000-4000左右。   基本上每個月做1次產檢就可以了 (私家自費,大概$500-$2000左右),過完最重要的三關之後,開開心心倒數等卸貨!   希望以上分享幫到各位新手媽媽,祝大家一路好孕 : ) -------------------------------------------------------------- 孫師奶 80後女生 l 香港媽媽 l 加拿大移民 https://www.facebook.com/workingmamabyemi