之前疫情開始之後，有一段時間覺得又要照顧小朋友，又要照顧大朋友（爸爸），好鬼麻煩。但最近發現，我呢個全職媽媽做耐咗，就越嚟越自以為是咁，有爸爸喺度反而做咗一個中間人、第三者嘅角色，我就發現自己原來都有好多不是⋯⋯ 有一個事例，我就喺度開咗飯咁等坡士 b妹埋位食飯，點知佢就攞住手頭上個4個玩具走埋嚟飯枱。 我失去左耐性咁樣就喺度話佢，點知做緊嘢喺房嘅爸爸聽到，出黎問我咩事，就話其實佢係咪想搵啲嘢食俾我哋啊（佢成日將唔同嘅嘢放喺啲玩具玩碟上邊就當係嘢食咁）。 問返佢，佢答：「一碗比爸爸，一碗媽媽，一兜我既，一碟比龜妹既」。（題外話，我地屋企呢年多咗隻龜妹 <3） 媽媽們如果有時發生同類嘅事件，要記得記得同小朋友道歉，守護住小朋友們嘅天真同埋心意，係好重要嘅使命。 呀，打打下諗起，唔知大家有冇試過怪錯小朋友呢？ 諗起有一日個女放學嘅時候，成身都係意粉汁，成程係咁話又玩食物啦（因為之前老師成日話佢喺度玩嘢食），而佢就話「I didn’t play food, 係唔小心」，但媽媽就自以為是咁係咁講佢。講講下，佢就好似以為自己真係做錯野咁。 點知第二日爸爸一齊送返學，巧遇校長，阿爸投訴話佢尋日係咁俾阿媽話，點知校長話佢真係唔小心倒瀉咗碗意粉。 之前我覺得坡士b妹淨係三歲，有時啲表達能力唔好，所以媽媽嗰陣時有啲自以為是咁。 我嗰日返咗屋企之後就勁內疚咁樣眼濕濕，有時自以為是咁以為自己好了解自己嘅小朋友，但係其實我哋都跟唔切小朋友成長嘅步伐。 我哋成日都識得尊重其他人，更加應該要尊重我哋自己個寶貝。 所以花多一啲耐性，花多一啲口水，問多幾句，再判斷究竟應唔應該責怪小朋友，都係一個媽媽們好大嘅課程。 真係怪錯咗嘅時候，唔好覺得自己高高在上咁唔需要去講對唔住，我哋要做我哋小朋友嘅role model，錯就要認要道歉，咁樣先至可以令到佢成為一個更加好嘅人。   ---------------------------------------------------- Facebook: SINGAPORE.BABYDIARY INSTAGRAM: SINGAPORE.BABYDIARY