副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

玩足一整天!富來優閒農莊

疫情後香港人喜歡行山,親親大自然之餘,又可以除低口罩抖一抖!但呢排天氣咁熱又要轉下陣,今日帶大家去到農莊玩可能你會話:呢d天氣去農莊一定熱死啦!但呢度除左農莊仲有好多野玩架!以下介紹嘅全部都係室內進行

疫情後香港人喜歡行山,親親大自然之餘,又可以除低口罩抖一抖!但呢排天氣咁熱又要轉下陣,今日帶大家去到農莊玩 可能你會話:呢d天氣去農莊一定熱死啦! 但呢度除左農莊仲有好多野玩架! 以下介紹嘅全部都係室內進行嘅 其中嘅重頭戲就係「勾蝦」,顧名思義就係利用魚桿上嘅「三爪鉤」直接係蝦池將蝦勾起! 唔好諗住好簡單呀,隻隻都係真蝦,被勾係會掙扎逃走!同埋都幾大隻架! 小小心得俾大家,可以瞄準佢地嘅長手或者蝦尾勾起,記得勾中就要盡快用「陰力」拉起啦 勾蝦場就係呢兩個白色池,都有為數唔少嘅蝦!小朋友搭擔張櫈仔跪係上面就夠哂高啦! 藍色呢個係難度較高嘅「釣蝦池」,即係要用魚餌引蝦進食時釣起,適合大朋友去挑戰身手 我地最後勾左3隻蝦就收手,其實唔係因為太難,而係勾到嘅蝦係需要俾錢購買架!而且勾到就必備購買,不能夠放生,所以需要幾多就勾幾多喇!(不過釣蝦就係釣到幾多都係免費全取嘅) 勾蝦嘅價位係$9/兩,即係點?我地呢度3隻蝦就已經$72架啦 咁勾完嘅蝦又點處理呢?呢度會免費提供炭爐俾你即場鹽燒! 只需要稍稍清洗再用竹籤串起,就可以係鹽堆上翻滾   用炭火即場燒烤嘅蝦,真係隔住個螢幕都聞到陣香味,有點提番大家,粗鹽跌落去炭火時有機會會彈起,最好就由成人處理啦 重點係超級好食!蝦肉唔痴殼又夠彈牙,而且蝦頭都有幾多膏!蝦係一種好快熟嘅食材,建議大家燒大概8-10分鐘就可以啦 除左蝦,呢度仲有魚池可以釣魚,一樣可以即釣即燒即食架! 除左燒蝦燒魚,亦都可以join BBQ package去燒野食,最重要係110cm以下嘅小朋友係免費架! 呢度採取任燒任食3小時,飲品就包一支水及汽水,丸類同肉類都幾豐富,味道都唔差 嫌唔夠味呢度仲有唔同調味料俾你選擇 我最愛嘅燒烤粉都有,但記得用完要歸還呀 燒烤方式採用網燒,呢d炎熱天氣幾個大人輪住睇火就可以,仲可以一次過燒大量食物,夠哂方便 基本餐具好似紙碟木筷子都會免費供應,不過就冇叉用!小朋友仲細的話建議自備啦! 另一樣媽媽們最擔心嘅野就係清潔啦,場主好貼心咁準備左櫈仔俾小朋友洗手,廁所就屬於一般流動廁所水平,果日我地去時比較少人所以都幾乾淨啦   食飽飽又可以繼續玩,呢個偽。Peppa Pig彈床免費任彈   仲有個小小滑梯,雖然就唔大嘅,但疫情後小朋友有得一齊玩玩咩都開心啦! 免費項目仲有兩部單車仔(不過就唔係踩得好順,反正阿桃就係踩唔到) 同小小足球場俾小朋友放電,足球都係場主提供 再唔係可以去小賣部買支泡泡水,小朋友同樣玩得開心!   之後就介紹自費項目,其中吸引度最高一定係電動越野車!真係唔好講笑,車速比一般商場玩嘅快好多!   越野車出面真係比較少見,上落樓梯都可以handle到,刺激度大大提升! 車款有分大型同小型,大概適合6歲以下小朋友,小小b想玩又擔心佢控制唔到可以問場主拎埋配備嘅遙控器由大人控制 價錢係$50/30分鐘,抵過出面好多好多! 另一樣勁吸引嘅就係遊戲機啦 想介紹下夾公仔機,2個幣一局,但係係佛心機台,個抓實到夾到隻公仔變形咁,小朋友都絕對夾得到! 呢部機相信都好多小朋友玩過,1個幣5粒波子,彈中指定格又多3粒,沒完沒了咁玩,大人燒烤時放仔指定項目   籃球機就要3個幣一局 坐下車仔2個幣 代幣要去小賣部換購,$20/10個幣 或 $50/30個幣 撈金魚 $30/8個紙網,撈到的話可以拎番屋企 另外有撈假魚(不過呢個就唔記得幾錢) 叫得農莊當然有菜賣,仲可以親手去摘添,只要搵農夫叔叔幫手問下有邊種係收成得嘅就可以啦,自家種植比街市貴大概1-2倍,買個回憶同體驗可接受啦! 小朋友超開心! 茄子都好靚!可惜農夫叔叔話仲未到收成期,你地下次嚟可能就摘得架啦!   最近大熱嘅太陽花呢度都有 雖然不及花田咁壯觀,但小小地影相打卡都可以啦,原來太陽花就係會面住太陽開花架喎! 嚟得農莊都預左俾人放血,但呢度嘅物價又唔算太貴,冰菠蘿$8/片 $15/2片   彩虹雪條$15/支,飲品一般都係$10/支,另外仲有自家煲嘅冰凍涼茶 人均消費大概係$150左右,個人覺得好OK呀,雖然地方細細,但我地一行人都玩左4-5個鐘,不過如果少大人同行嘅就建議唔好join燒烤package了 燒烤預約訂座仲有95折架! Tel: 6273 0538 李小姐 開放時間: 星期五六日假期 早上10:00-零晨01:00 星期一至四 *平日 早上10:00- 晚上11:00 地址:元朗 錦田 水尾村 DD107 1750A5 RP ( 駕車: 青山公路~長春新村路口入 ) 免費泊車 詳細地址及交通請到官網:http://www.yl.hk/bv/i_map.html