「一孕傻三年」，我總共經歷咗兩次，而第二次更加嚴重，更多烏龍事。   上星期洗衣機壞咗，老公拆開清走雜質嘅時候，搵到我唔見咗一年嗰張八達通嘅碎片。我完全冇諗過會係褲袋冇拎出黎，因為每次洗衫我都會檢查下褲袋有冇野先放入去洗。記得嗰時唔見咗張八達通我仲好慌張周圍搵，仲諗跌咗係邊到，搵咗一個星期都搵唔到，最後先申請過張新。   最嚴重嘅係，喺放完產假復工後冇幾耐，夜晚老公丟垃圾嗰時發現我條鎖匙插咗係門口，好彩發現到，如果放過夜喺出面就會好危險，真喺嚇一嚇，好似完全冇晒記憶咁。   頭半年返工成日都唔記得野，claim完錢又去問有冇claim過；同朋友傾計問近況，講完又唔記得，再問過，朋友就話：「頭先咪講咗囉」，呢d情況都好尷尬，但喺又唔識解釋點解會咁，總之就係集中唔到啦。   其實生完BB點解會有傻三年呢個問題？我覺得主要係因為唔夠休息影響，令到集中力同記憶力都差咗好多。湊初生BB一日餵奶換片掃風各十次，根本冇咩時間訓覺，到返咗工之後又要忙泵奶，半夜起身餵夜奶，令到個人嘅精神好差，所以出現咗咁多問題。   除咗休息唔夠呢個實際因素之外，近年有研究證實「一孕傻三年」呢個說法原來係有科學根據。喺懷孕過程開始，大腦裡面同社會認知相關區域嘅灰質會減少，幫助媽媽準備同BB建立親密關係，估唔到身體嘅構造係咁奇妙。   我生咗第二胎已經一年半，今日切水果嗰時突然發現唔見咗隻戒指，跟住好慌忙咁左搵右搵，仲走咗去垃圾筒搵咗兩次，最後竟然係雪櫃搵到，幾時跌咗落去我都唔記得。   媽媽生完BB之後真係身心都好需要支援，如果喺重要嘅事自己一定要記低，老公記得要事事留神睇多眼，避免發生危險，因為老婆已經冇以前咁好記性。   Photo source: Pexels