副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

【BLW分享】在職媽媽與BLW寶寶的實戰經驗

你會唔會都有呢啲疑問呢:「在職媽媽點行BLW呢?」、「照顧者唔肯BLW,咁咪要行半BLW?」

你會唔會都有呢啲疑問呢:「在職媽媽點行BLW呢?」、「照顧者唔肯BLW,咁咪要行半BLW?」 如果你有呢啲煩惱,睇吓呢個分享啦 我都係在職媽媽,唯唯同悠悠自6個月大開始就用BLW加固。總結經驗,以下呢幾點我覺得好重要。 1. 照顧者嘅意願 在職媽媽都需靠工人姐姐或者長輩幫忙照顧小朋友,雖然我哋係媽媽,但都要尊重佢哋嘅意願。佢哋可能有唔同理由而唔接受BLW,例如:驚BB哽親、忍受唔到BB食得好污糟、清理好麻煩、BB食得好慢或甚至BB唔願意自己食等等。 勉強無幸福,如果夾硬要照顧者跟隨自己想BB BLW嘅意願,可能會有唔好嘅效果;一來touch wood有咩事發生,佢哋未必識同敢處理,二來,佢哋見到BB食得慢同污糟,其實有機會餵返佢,都係行唔到BLW。正所謂,#沒有最好只有最適合。BLW唔一定係最好,只要係適合你哋嘅BB同家庭環境,就係最好嘅加固方式喇 2. 為BLW做好準備 無論係在職定全職媽媽,都最好先學識急救,而照顧者當然都要學啦。我、唯爸同工人姐姐都喺紅十字會學過急救,有中文同英文班,英文班班數比較少同疏,所以要早啲睇定呀。不過而家疫情嚴重,可以睇住YouTube學先,再搵個假BB實習一下。其實就算唔係為咗BLW,都不妨學急救呀,萬一有咩事起上嚟都可以幫到小朋友嘛。 另外,就係俾照顧者睇有關BLW嘅相、片段同資料,唔一定睇晒成本書,但最少要知個理念、實行方法同好處,亦可以俾佢哋有心理準備,知道BLW係點,尤其是俾佢哋睇吓混亂嘅情況,睇吓接唔接受到先。 3. 如何實行 BB初初開始時,未必會食得好好,亦較易有特別情況出現,例如濁親(Gag),父母見到都會緊張,更何況係照顧者呢?所以,一開始最好由父母睇住先。 兩兄妹剛開始時,我每晚放工返去睇住佢哋食,安心啲之餘又可以了解到佢哋嘅狀況同喜好。初初準備食物同兩兄妹進食嘅時候,我都會請工人姐姐喺旁邊睇,等佢知食物嘅合適大小同形狀,同見到BB嘅進食情況。 媽媽都要有心理準備,照顧者見到混亂情況同BB食得慢,可能會卻步㗎。呢個時候,媽媽可以俾照顧者知道,個個BB一開頭都係咁,即使一歲先學自己食都有機會係咁混亂,只要俾多啲機會BB嘗試,practice makes perfect,BB好快就可以食得好又乾淨,咁照顧者到時就可以輕鬆好多喇。 到兩兄妹開始食得好,又代到晚餐,確定照顧者放心睇住佢哋食,我就放手,俾工人姐姐睇住佢哋食埋午餐,而佢哋大約喺8-9個月大就開始兩固喇。 呢個做法可能會比傳統餵食(TW)或者全職媽媽嘅BLW寶寶慢少少先加多一固,但一歲前都係以奶為主食,而且食嘢唔係鬥快嘛,最緊要係BB健康同安全 4. 行半BLW? 其實BLW唔等於「用手食」,而係一個俾BB接觸食物嘅過度方式,背後亦有好多理念(有興趣可以睇吓 https://www.facebook.com/weplaynlearn/posts/2042604709097847),所以一餐餵食,另一餐自己食,就未必能完全達到BLW本來嘅目的喇,所以都冇所謂「半BLW」之說啦~ 而且本來TW BB到某個月齡都要食finger food(健康院書仔都有講),所以BB用手食又被餵食唔係叫「半BLW」呢 Please like & follow us: Facebook:https://www.facebook.com/weplaynlearn/ Instagram:https://www.instagram.com/kly.chu/