副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

剖腹分娩篇(下)

上回講到入到手術室打完麻醉針啦,之後既手術過程係點呢,快啲繼續follow啦  ⠀ 手術期間 麻醉醫生打完麻醉針之後,佢唔係就走左去架,佢係成個手術過程都一直擔當住好重要既角色,就係安慰我呢個每事問既媽媽,一路聽住手術室播住既歌,其實都無減低我既緊張,雖然一齊都無感覺,但都會好驚唔知醫生係下面做緊咩。(因為開刀會用手術布由頸對下就遮住晒,其實老公坐係隔離佢都係咩都睇唔到,連鄭醫生都見唔到架) 係大約鄭醫生話開始之後5分鐘,麻醉醫生就話BB準備要出黎啦,佢係我肚頂近胃既位置好大力push左幾下,佢一路話呢幾下係會好辛苦,叫我要頂住,確實係撳落去果幾下係幾想嘔,然後我聽到鄭醫生話「媽媽辛苦啦,BB已經出左黎啦」佢仲講笑竹竹唔洗等佢打屁股就已經哇哇喊,佢無得幫我報仇打佢蘿pat  ⠀ 護士會抱BB去側邊既地方幫佢抹乾淨同吸胎水,同時間鄭醫生就繼續幫我清理胎盤、惡露同聯線。大約幾分鐘護士清理完之後,佢就將竹竹抱去我膊頭上面,叫爸爸痴個頭埋我地度,佢就幫我地影合照,呢張官方相就成就了我地既第一張全家幅啦,媽媽記得一定要戴返好頂手術帽,如果唔係就會好似我咁肉酸架啦。影完相之後,護士就會抱竹竹返入保溫箱,推佢返育嬰室等做詳細檢查,我就叫爸爸跟埋出去影多啲相啦,仲有姨婆同丈公佢地係手術室出面等緊竹竹出去。⠀  ⠀ 手術後 成個手術過程大約1個鐘,我都好似訓著左,到我打開眼既時候已經係手術復甦室,姑娘話休息一陣就會有姐姐推我返房,呢個時候鄭醫生都黎睇左我一陣,佢就同我講拜拜啦。⠀  ⠀ 返到病房都係平訓係度郁唔到,因為麻醉藥仲未過,姑娘每隔一陣就會黎幫我量血壓,佢話大概去到夜晚10點左右都無唔舒服無嘔就可以飲粥水啦,因為由手術一直都插住尿喉,其實都唔會覺得急尿,我就一路恰下又一路睇下電話J下竹竹啲相啦。大約8點左右,兒科醫生就黎同我講關於竹竹既情況,其實都係講下佢最初食奶同濕片既狀況啦,仲有每次黎都會叫我開airdrop send返晒竹竹啲相比我啦,另外都有講下要打預防針同做唔做代謝病測試  ⠀ 醫生巡房 夜晚開始過麻醉藥,我就嘗試微微側身郁下下半身,幫助腸郁動下放屁嘛,之後姑娘黎巡房時就話我可以試下食粥水同淡既炒米茶,佢話聽朝如果醫生巡完房可以自己落到床就可以去餵奶房餵竹竹食奶啦⠀  ⠀ 半夜都係半睡半醒,雖然已經係住二人房,但因為隔離媽媽既鼻鼾聲太大聲,我都係訓唔到,終於捱到天光啦,鄭醫生黎巡房,幫我檢查傷口,同幫我縛埋束腹帶,就吩咐姑娘可以幫我拆尿喉同鹽水啦,我就要落床去廁所試去尿尿,同順便換安睡褲,著網褲真係勁唔自在,又痕又勾住毛毛。⠀ ⠀ 第一次落床去廁所一定要叫姑娘陪住呀,因為麻醉藥同太耐無落過床,會好易暈架,可以成功落到床去廁所之後,我就係床邊企下行下又坐下,等到第一個餵奶時間就去餵奶房抱竹竹啦  ⠀ 餵奶時間 仁安醫院一日有5節既餵奶時間,一入院登記既時候,姑娘已經會問定媽媽餵唔餵人奶同補邊隻水奶,如果媽媽係揀左餵人奶既話,只要依住佢既規定時間去餵奶房就可以餵BB架啦,不過我半夜果轉奶多數都無去餵,因為真係實在太眼訓,如果覺我胸漲同埋石頭胸,可以去問姑娘拎定儲奶樽,手揸落樽再拎返去餵奶房比姑娘,佢地就會下一餐幫你餵BB架啦。⠀  ⠀ 醫院膳食 我最初就係懶得諗,所以就join左佢既產婦膳食套餐,不過其他媽媽話仁安既cafe都好好食,亦都唔貴,散叫既選擇仲多,所以我今胎都唔會join套餐喇。另外我係醫院既5日4夜都係飲陳皮炒米茶,無飲過白開水同其他野,醫院既姐姐會一日換兩壺熱水,唔夠可以請佢地再換⠀  ⠀ 沖涼 醫院有提供到薑水,雖然我係醫院無沖過涼,但每日竹姨婆或者竹爸都會用薑水幫我抹身,我去完廁所都會用薑水洗手,都係一日會提供兩壺架,所以媽媽記得要帶一個細既洗面盆入院呀⠀  ⠀ 好喇,醫院剖腹分娩記就去到呢度先,記得既就再寫啦,多謝收看  ⠀ #開刀生產⠀ #剖腹分娩⠀ #仁安醫院⠀ ⠀ ——————————————⠀⠀ ❣️IG : www.instagram.com/tamsiumoon⠀ ❣️Fb: www.facebook.com/tamsiumoon0521 ⠀ ⠀ ⠀⠀ #山竹媽X竹竹日誌 #新手媽媽 #竹竹 #育兒日誌 #二寶媽 #孕媽媽 #孕媽咪 ⠀⠀ #加固心得 #母乳餵哺