副食品
貼紙書
親子餐廳
親子共讀
積木
產後瘦身
教養
拼圖
戒夜奶
追奶

豆沙媽媽內心小劇場: 早產父母對醫護人員的愛與恨

舊blog 搬屋加幾句

舊blog 搬屋加幾句 而家疫情反覆上上落落,醫院好多時都改政策,限唔俾探BB或者探得好少時間   希望早產父母明白幾點 1. 早產BB係有醫療需要而未出得院,醫院唔係搶咗你個BB,專登難為你地,令你地母子分隔異地 2. 醫院,醫護人員有責任去保護佢地病房裡面的所有BB,唔止你個一個,係所有BB,免於受新冠肺炎感染 3. 當你覺得醫院policy不近人情時,請理解醫院的出發點係要將BB受感染的風險減到最低,包括你個BB 4. 明白無得見,係會好掛住,好難捱,無人會想咁樣,但係無奈地情況無得控制,唔想都無辦法,唯有希望BB乖乖快D出院 5. 佢地其實係疫情下仲多咗好多野做,更加需要父母多D體諒   <<呢篇純粹個人感受,有感而發,有啲政治,不喜請自行轉台>>   其實香港醫療十個煲七個蓋己經唔駛豆沙媽媽講   早產父母對醫護人員係又愛又恨,個心情好矛盾, 因為全靠佢地先救到早B,但亦只可以靠佢地,無其他選擇會令你好易上火   豆沙姨姨係公立醫院做護士,豆沙爸爸媽媽都有幾個中學同學仔係公院同私院做護士,對於護士呢個行業好尊敬   佢地其實係 用自己的健康去換取病人的健康,為的唔單止係份糧,多多少少都有一份使命感,有一團火係心入面   好似豆沙姨姨咁 番一更只有 開工前 同收工後先有得去廁所 一更講緊成八個鐘   但並唔係所有早產父母都會好似我地咁了解護士醫生所背負的壓力同面對的環境   同啲早產媽媽傾開,通常對醫生護士嬸嬸都係負面的評價   例如早產b 10個有10個都會經歷的"打豆", 啲媽媽成日好心痛打豆 打好耐 吉晒手手腳腳 先吉到, 覺得D醫生好衰,唔得,唔專業   其實打豆呢下真係好無奈,其實大人打豆都唔易, 豆沙媽媽自己有時打完都會瘀晒,唔好話咁細個Bb,  如果打豆的係一個未足月bb, 佢地啲血管超幼, 分分鐘同頭髮一樣咁幼.    但唔打又唔得,為咗佢條命,無得唔打. 唔通就係因為佢痛而唔幫佢打咩,打豆係要救佢條命呀.   上次豆沙脫水入醫院,醫生有猶豫唔幫豆沙打豆,話怕媽咪心痛 豆沙媽媽好清楚如果豆沙touch wood 有咩冬瓜豆腐我到時幾心痛都無用,所以我好堅決係必須就要打   心係痛 但 佢條命緊要過你心痛   豆沙早產仲訓緊箱,豆沙開頭打豆,豆沙媽媽都勁心痛,勁嬲點解要係實習醫生打,搵我個bb嚟較飛   但豆沙爸爸開解我 佢話公立醫院 一定係有實習醫生 一針打到 ,五分鐘搞惦的醫生,十年前其實都係實習醫生,實習係無可避免,唔俾佢地實習,等到而家呢批醫生退休的退休,去私院的去私院,到時就無人識打豆,再無人再救到BB 而且醫院有固定機制,如果係緊急情況當然唔會俾實習醫生試啦   豆沙媽媽相信人心肉做,實習醫生同bb無仇無怨,唔會專登拮到bb成身傷,實習醫生唯一可以做就係不停練習,咁先會愈嚟愈掌握到個技巧 如果我係實習醫生 有得揀我都會想一次搞惦 快手處理下一個,而唔係打晒左手右手左腳右腳都未得   豆沙媽媽係NICU期間,有一次見過有個護士長同實習醫生講 "有個豆你打唔打" 個實習醫生 講笑話 "整啲咁ge好野益我呀" 佢睇落有啲唔情願 但 轉頭佢已經自己拎櫈,好耐心咁坐咗係個箱前 幫bb打豆   見住佢一邊賞試係隻超細的手到 搵條幼尾尾的血管出嚟 再插個導管入去, 要好小心咁插正條血管  但另一邊bb 其實不停喊 不停掙扎 實習醫生又要停落嚟安撫下bb,等佢無郁得咁勁 到佢bingo 的時候 仲要hold 住再叫護士幫手整同貼好   終於打完一個豆 個實習醫生個樣係又滿足又攰, 仲成頭大汗, 搞咗成半個鐘有多   實地睇過一次打豆,加埋豆沙爸爸的說話 豆沙媽媽改變咗自己心態,調轉諗 希望我bb俾佢打完,可能真係好痛,吉幾次先得 但 實習醫生練習咗一次,幫到佢多一個經驗,下一個bb就唔駛咁慘咁痛 咁樣諗,個心就好過啲   當早b出世,醫護人員係早b同早b父母的唯一依靠 我地好感恩佢地救咗豆沙,好悉心咁照顧佢 75日的住院經歷裡面,我地見過盡唔同的醫生,護士,嬸嬸 其實大部分都係好好人,無可否認係有一兩個特別差 人質係佢地手上, 就算投訴都要諗清楚先   雖然佢地有試過解釋唔清楚嚇到我爆喊,有試過用錯奶樽餵錯奶,又無換片爛咗個pat,但我地overall 都好感恩 遇到好多好好的醫護人員   有嬸嬸 會走嚟同我講豆沙飲奶飲得好好,好鐘意餵佢,叫佢做班長 有護士 記得晒豆沙訓過幾多個床位,分別幾號 有護士 會嚟同我講笑話要投訴豆沙好跩成日自己抆胃喉玩 有護士 會記得豆沙個花名係隔離房番工都專登嚟睇下佢 感恩有佢地 豆沙先安全健康咁畢業番屋企   其實同人相處 不外乎尊重有禮,講多兩句唔該,俾多D 耐性, 你點對人時,人點對你 個個BB都係咁, 佢地唔會無緣無固針對你個B, 有時間佢地都寧願做快D,快D 做晒D 野   早b父母要好清楚,醫生護士嬸嬸只係醫療上照顧bb, bb唔係佢地ge仔女 早b的父母都要盡量抽時間去醫院落心落腳去照顧bb,唔好將照顧bb的責任完全推晒落去醫護人員到 自己落手落腳換片餵奶, 呢啲本來就係父母的責任,    係75日裡面,見盡醫生護士同嬸嬸真係無停過手,好多時都要等佢地,佢地好多時真係好無奈 啲資源落晒去起大白象,然後無錢俾醫療, 一年150 個新移民有入無出,一齊煲爆醫療系統 D人繼續唔理政治,繼續去旅行,吃喝玩樂. 遲早俾人賣咗都唔知咩事   你可能會話 我有錢 入私家 就無問題 , 其實並唔係咁簡單   1. 豆沙 住威院75日 見住唔同的私院 早B call 白車嚟入威院的NICU,浸會仁安都見過 無錯私家係會將啲早b transfer 番過去公立醫院!   2. 就算私家真係肯收早b,最後埋單有可能係要按咗層樓先夠的天文數字 而且 早b 無保險 係私家生樣樣都係錢錢錢, 連吸黃金初乳枝針筒都續支同你收錢 收到豆沙的住院單, 佢會寫原本非港人的價錢, 個一刻就覺得交咁年稅都真係抵番晒 (當然無用到就最好啦)   3. 如果 有錢就解決到,其實深圳河以北的人都大把錢,到時就算私院都會有供不應求的情況出現  私院就推高個價去服侍比較有錢的人,可能你會話唔驚,我有買保險 但你肯定保險唔會因為私院加價而加保費?羊毛出自羊身上的道理大家應該明   4. 早產b買保險有一定難度,好多一歲前唔受保. 而且一歲後受保都仲要睇幾多週出世,咩問題,評估晒先會處理,仲要唔係你俾錢佢就肯受你保. 有咩事,其實你都係去番公立   5. 早產b係公立醫院有齊所有record,豆沙隻file 成吋幾厚, 齊晒咁多科,所有病歷紀錄 一清二楚 係緊急情況下 齊全的醫療紀錄好緊要   6. 有朋友試過BB有事半夜去私家醫院,但無兒科醫生,要call 醫生睇下有無醫生番, 仲好似要另外俾錢咁樣 係公立就一定唔會有咁情況   所以呢, 其實政治真係一直同我地好近,唔到你避